वसई विरार शहर महानगरपालिका क्षेत्रातून वगळण्यासाठी प्रस्तावित 29 गावांसंदर्भात लेखी सुचना व हरकती दाखल करण्याची मुदत 01 डिसेंबर 2020 पर्यंत पालघर (प्रतिनिधी)दि. 25 :- शासन अधिसूचना क्र.

वसई विरार शहर महानगरपालिका क्षेत्रातून वगळण्यासाठी प्रस्तावित 29 गावांसंदर्भात 

लेखी सुचना व हरकती दाखल करण्याची मुदत 01 डिसेंबर 2020 पर्यंत

 पालघर (प्रतिनिधी)दि. 25 :- शासन अधिसूचना क्र. वविम-2009/88/प्रकरण 244/09/नवि-23 दिनांक 31.05.2011 संदर्भात मा. उच्च न्यायालय, मुंबई येथे सुरु असलेल्या याचिकेमध्ये दिनांक 08/10/2020 रोजी झालेल्या सुनावणी दरम्यान मा. उच्च न्यायालयाने वसई विरार शहर महानगरपालिका क्षेत्रातून वगळण्यासाठी प्रस्तावित 29 गावांसंदर्भात त्या क्षेत्रातील सर्व घटकांसोबत व्यापक सल्लामसलत करुन तद्नंतर यथोचित अंतिम निर्णय घेण्याचे शासनास आदेश दिले आहेत. त्यानुसार शासनाने अहवाल सादर करण्याचे निर्देश दिले आहेत. तसेच दिनांक २३/११/२०२० च्या पत्रान्वये "Unit of Administration" काय असावे ? याबाबत देखील हरकती सुचना प्राप्त करुन योग्य अभिप्राय सादर करणेत कळविले आहे.

सद्यस्थितीतत कोव्हीड-19 चा प्रार्दुभाव विचारात घेता प्रत्यक्ष सुनावण्या घेणे संयुक्तिक होणार नाही याकरीता प्रस्तुत क्षेत्रातील व्यक्ती/संस्था/लोकप्रतिनिधी इत्यादीनाआपल्या लेखी हरकती /सूचना /निवेदने सादर करण्यासाठी पुरेशी संधी देणे आवश्यक असल्यामुळे वाढीव कालावधी देण्यात येत आहे.वसई विरार महानगरपालिकेतून 29 गावे वगळणे बाबतच्या हरकती सूचना बरोबरच संबंधित 29 गावे हि महापालिकेतून वगळल्यास/ वेगळी झाल्यास "Unit of Administration" काय असावे म्हणजेच ती ग्रामपंचायतीच्या स्वरुपात रहावी अथवा त्यांची स्वतंत्र नगरपालिका व्हावी. याबाबत नागरिकांना हरकती/सुचना/निवेदने दाखल करणेसाठी खालील प्रमाणे कार्यक्रम निश्चित केला आहे व अधिकारी यांना निर्देशित करण्यात येत आहे.

लेखी सुचना व हरकती दाखल करण्याचा कालावधी  : 

२५ नोव्हेंबर ते ०१ डिसेंबर २०२० (शासकीय सुट्टीचे दिवस वगळून कार्यालयीन वेळेत)

सुचना व हरकती दाखल करण्याची ठिकाणे :

1) उपविभागीय अधिकारी कार्यालय, वसई जि-पालघर - उपविभागीय अधिकारी, वसई

2) वसई-विरार शहर महानगरपालिका, उपायुक्त यांचे कार्यालय, विरार - उपायुक्त,(सामान्य) वसई विरार शहर महानगरपालिका

3) निवासी उपजिल्हाधिकारी यांचे कार्यालय, जिल्हाधिकारी कार्यालय, पालघर - निवासी उपजिल्हाधिकारी, पालघर

4) प्रादेशिक उपसंचालक यांचे कार्यालय, कोकण भवन, नवी मुंबई. - प्रादेशिक उपसंचालक, नगरपालिका प्रशासन, कोकण विभाग.

तरी या जाहीर सुचनेद्वारे आवाहन करण्यात येते की उक्त कार्यक्रमानुसार वसई विरार शहर महानगरपालिकेतुन 29 गावे वगळण्याबाबत तसेच गावे वगळल्यास "Unit of Administration" म्हणजेच पुन्हा ग्रामपंचायती ठेवाव्या अथवा स्वतंत्र नगरपालिका स्थापन करावी याबाबत देखील संबंधित इच्छुक व्यक्ती/संस्था/ लोकप्रतीनिधी इत्यादी यांनी उपरोक्त नमूद ठिकाणी सुट्टीचे दिवस वगळून कार्यालयीन वेळेत लेखी हरकती/सुचना/निवेदने सादर करावी.